Klúbburinn Geysir

Vaxandi klúbbur
Í meir en tuttugu ár hefur Klúbburninn Geysir markað spor sín í geðheilbrigðismálum Íslendinga með því að bjóða einstaklingum hlutverk, ábyrgð og tækifæri til þess að hafa stöðugleika í lífi sínu. Undirbúningur að stofnun Geysis hófst árið 1997.

Árið 1999 gaf Dómsmálaráðuneytið út skipulagsskrá fyrir klúbbinn og staðfesti formlega starfsleyfi klúbbsins. Starfsemin hófst í tveimur litlum herbergjum í Hátúni 10 og fljótlega myndaðist kjarni 10-15 félaga. Í janúar árið 2000 bauð Reykjavíkurborg klúbbnum til leigu 200 fermetra húsnæði á Ægisgötu 7 og starfaði hann þar í eitt ár. Í október árið 2001 stóð Kiwanishreyfingin fyrir landssöfnun í þágu geðsjúkra og fékk Geysir 10 milljónir í sinn hlut, það gerði klúbbnum kleift að kaupa 400 fermetra húsnæði í Skipholti 29 í félagi við Brynju hússjóð Öryrkjabandalags Íslands. Um áramótin 2021 – 2022 voru 480 skráðir félagar í klúbbnum.

Félagskapur
Klúbburinn starfar eftir gagnreyndri hugmyndafræði Clubhouse International og er tilgangur hans að virkja félaga klúbbsins til þátttöku í samfélaginu. Það er gert með því að halda uppi vinnumiðuðum degi með félögum, þar sem eru í boði fjölbreytt verkefni, sem öll miða að rekstri klúbbsins.

Hið innra starf byggir á gagnkvæmum stuðningi og virðingu fyrir öðrum. Að hjálpa og aðstoða aðra felur í sér sjálfshjálp. Í starfi Klúbbsins Geysis eru engar kvaðir lagðar á félaga umfram það sem hver og einn er tilbúinn að gangast undir. Starf klúbbsins byggir meðal annars á umhyggju, og eflingu félagsfærni, þess vegna er þörf fyrir hvern og einn félaga. Með því að gefa hverjum félaga tækifæri á því að nýta sínar sterkustu hliðar eflist viðkomandi til fjölbreyttrar þátttöku í samfélaginu. Félagarnir fá einnig aðstoð við húsnæðis- og atvinnuleit, stuðning vegna náms auk þess sem boðið er upp á félagslega dagskrá eftir vinnu dagsins alla fimmtudaga og einn laugardag í mánuði.

Er Klúbburinn Geysir staður sem hentar þér?
Fólk sem á eða hefur átt við geðrænar áskoranir geta orðið félagar í klúbbnum. Engin félagsgjöld eru í klúbbnum. Þegar þú gengur í klúbbinn gleðjumst við yfir þátttöku þinni. Félagsleg einangrun þarf ekki lengur að valda vanlíðan, því í klúbbnum átt þú félaga sem láta sér annt um velferð þína. Þú hefur allt að vinna. Taktu fyrsta skrefið í átt til betra lífs.

Í Klúbbnum Geysi leggur hver og einn sitt af mörkum eftir getu og vilja. Allir hafa eitthvað að gefa og hver félagi er mikilvægur í starfsemi okkar. Hugsanlega getur tilvera þín og líðan breyst til betri vegar.

Við horfum til þín og getu þinnar en ekki á sjúkdóminn þinn.

Þú skiptir máli!